登錄站點

用戶名

密碼

麻Luck日記之四樓風雲

18已有 1268 次閱讀  2011-06-02 19:29   標籤麻雀 

首先要多謝各方支持與指點,「精雀門」總算找到方向。希望各位繼續支持,比多D意見,達到「精雀精神」!

不過話雖如此,雖然在雀壇浸淫日久,但突然間要個上左自動波的腦去嘔返D思路理由出來,等如叫你寫出小時候怎樣學行一樣,不知從何說起!我份人無嘜好,最好就係吃得開,船到橋頭自然直,走著走著再算!

但野始終要做為了找靈感,所以決定去「佐敦四樓」走一轉找找頭緒

話時話,打牌一般人通常自組三五成群,雀腳定曬局先開局。我們這些半專業既係掉反轉到在"架部"先約人打!上到去搵食場地前同咩人打完全唔知。到左自然會找到人成局。「佐敦四樓」就是其中一個好去處,四樓萍姐在你開急須開局時絕對幫到手!

一上到去雀聲四起,心諗這次應該要食白果了點知入到去又有另一番境象!

「麻Luck哥,你黎就好啦!你頂我,我要去煮飯呀!」(一年365日都叫外賣的人居然會煮飯?!)

「點打呀?」「打五一全沖,三番起最大八番」

我一坐低就知道點解,有一位貌似詹培忠而我未見過的老兄手在擺來擺去,口在高聲講解上一鋪牌。另外兩位阿太只低頭執牌答幾隻字。唔講都知邊個贏開行!

 

「哈囉,阿生」「佢地叫我麻Luck!打到邊呀?定係由頭開始過?」賭仔好信邪,一般黎講未到四圈唔準換人,因為換人洩了氣,對贏開錢的人不利(依個亦係萍姐的陰謀)好熟而大家唔介意則另計。所以禮貌上要開聲問下人需唔需要開始過有必要。

 

「打到南圈最後一鋪」阿生話 (=無問題繼續!)如是者開始了今晚的麻雀之旅!

 

要打好麻雀,除左要有好章法好技術外,嘗試理解下你的對手也很重要!其餘兩位阿太打過好多次,阿生老哥則第一次見。今次他坐我上家,如果阿生是老手再加上其他阿太唔生性,有時都幾大鑊!

 

所以打麻雀時,要習慣望望你的對手。

好似係人都知,但唔知點解無嘜人咁做,特別在開局前。

 

我留意左老哥一陣,發覺佢講野時有D震,但又唔似有氣促。(由其是做地盤裝修的老哥,有時會有D氣短)個人大大份但全身縮成一條咁。好明顯係到發冷!體溫不正常的上升和下降係新手在初期打麻雀賭錢時常見問題,你想一下子控制也不能!只有多打多做慢慢自然改善。所以阿生哥打麻雀賭錢經驗我心裡有個底。

除左打冷震這些極端信號外,還有打牌手勢,出牌章法,諗牌速度等今次唔詳細講

 

雖然新手,牌路單純,但生哥確有點運道!手氣旺,往往開局兩三轉就左度右度,由頭到腳每一部位都話比你聽係堅野!其他兩家可能輸到怕,都唔敢正面衝突。要對付這類人兼你坐下家首先要挫他氣勢。唔知大家覺悟覺,如果你贏開,你拿到的牌會靚D,摸到的牌會順D,有時甚至可以要嘜有嘜。所以要以"快過他食糊"為目標。

 

生唇牌路走筒子清一色,其他兩家都繼續做大牌,不過未成氣候。你坐下家仲係筒萬鍾無艷(有二三粘牌),你會點打?

 

無絕對答案,我只係講講我當晚的打法比大家參考。我當時抱著跑馬仔的心態去打,即係斗快食糊!大家要記住,不輸給對手大牌你已經等於贏了,而且仲有錢收就更好!其做萬子清一色也無不可,只不過要拆筒子要面對可能出沖的風險同時,也要預左速度大減。做住三番一方面可快D叫糊,另一方面棄糊轉身容易。摸二三轉牌後叫糊(一定要自摸)最後生哥的運道不及我,比我無花,平糊自摸三番食出。

哩鋪牌比後面個萍姐勁讚(都話唔會煮飯啦!)好唔好好難定論,但起碼挫其銳氣,之後佢無咁順我地先有好日子過。

 

打麻雀要適當時候做適當既野。一時手氣唔好要識避一避,好似我咁做三番棄糊佔多過一半又如何?最後袋走兩舊幾走,夠比宵夜有凸,在「佐敦四樓」風生水起機會日後多的是呢!

分享 舉報
分享按鈕

發表評論 評論 (2 個評論)

  • 連理枝 2011-06-02 21:51
    你係入雀鋪打??? 阿媽由細到大就洗腦咁同我講叫我「唔好入去」,所以從來都唔知入面其實打牌點計...

    只知道高手眾多....  你的佐敦四樓是雀鋪嗎?
  • 麻Luck佬 2011-06-03 01:14
    當然不是!只不過是一班雀友聚在一起的地方吧了!而這些"架部"實情多的是,之後有機會再慢慢介紹。而竹館我也會分享下我的經驗,到時大家自然會明白分別在那!