登錄站點

用戶名

密碼

亞視報錯六合彩事件簿!

5已有 518 次閱讀  2013-06-21 20:57

亞洲電視在20/06/2013的第71期直播六合彩攪珠時出錯,攪珠結果應為11、14、16、29、31、46,特別號碼30,但亞視畫面唔見咗「16」,而特別號碼「30」就靜靜雞攝咗入去堆冧把裡面,變成「11、14、29、30、31、46」。但「六合彩小姐」周嘉莉又讀得啱喎。冇為意攪珠結果嘅觀眾,分分鐘真係不虞有詐,撕爛咗張飛先知自己原來中咗。

亞視在即晚接受傳媒訪問時,並沒有深入調查,就堅稱是馬會電腦故障。

於 21/06/2013 馬會向亞洲電視責問事件,亞視高級副總裁葉家寶就修正說法:「初步懷疑係電腦程式出現問題所致,我哋亞洲電視一向都好重視資訊嘅準確性,一定會徹查到底問題發生喺邊一度。同埋我哋加強番自己工作人員同埋藝員嘅培訓,希望以後就算機器有問題嘅時候,主持嘅反應係點樣樣。慶幸噚日我哋嘅主持讀出嚟嘅號碼係冇錯嘅。咁我諗我哋之後係會更加去重視、更加去了解…有時真係唔可以靠機器。」

唔係呀嘛,依家已經有藝員培訓班,就連黑雨都要去上堂,咁都仲唔夠?而且,噚晚周嘉莉係冇讀錯,係個電腦螢光幕錯喎。但亦有觀眾質疑,點解周嘉莉唔係對mon讀、跟埋佢一齊錯,於是有觀眾懷疑係咪有人一早知道晒啲中獎冧把………會唔會太陰謀論呢?

葉家寶就話﹕「我哋對於觀眾有呢個懷疑係致歉嘅,但係我諗最重要係藝人讀出嚟嘅數字,同實體嘅號碼係一樣嘅。只不過0依家我哋疊上去嘅號碼,有一個係跳咗,有一個係出唔到……至於係咪事前知(攪珠結果),呢個揣測完全係無稽。現場亦有監票嘉賓確定,之前都做咗好多公正性嘅功夫。我哋自己會調查清楚,確保唔會再發生。」

視第 71 期六合彩攪珠過程:

http://www.youtube.com/watch?feature=player_embedded&v=vTIJp6AWEnA


周嘉莉並無自亂陣腳,立刻走到攪珠機前讀出攪珠的正確號碼,真抵讚!


今日(21/06/2013)亞視喺新蒲崗嘅Mikiki商場舉行「亞洲之子•佳人選舉」拉票宣傳,「六合彩之子」蔡國威都有出席。一出嚟,當然又係被問到噚晚六合彩出錯單嘢,蔡國威話:「噚日出錯…第一樣嘢就係因為噚晚唔係我做嘅,係嘉莉做嘅。應該係電腦發生故障,電腦畫面出錯。如果你話係技術上出錯,而唔係人為錯誤,呢個一定要接受。」

蔡國威談及自己之前都試過遇到周嘉莉噚日呢個情況,佢話:「都係冧把出唔到,咁有即時話俾觀眾聽,好重複咁讀咗兩次啲冧把,咁就解決咗件事。技術上嘅問題,人為解決唔到,惟有靠個MC,好慢咁講多兩次,清楚咁解釋俾觀眾聽,其實就係呢六個冧把同個特別號碼喇。」

蔡國威又大讚噚晚周嘉莉表現專業:「佢都算係鎮定地,講番嗰六個號碼,因為佢比較新,以咁新嚟講,佢已經盡咗責,好鎮定咁重複六個號碼,我覺得都OK。」
分享 舉報
分享按鈕